তোমার প্রেমো পইরারে বন্ধু
যাইমু নাকি মইরা,
কিলার লাখান ভুইল্লা রইলায়
অতো মায়া কইরা।।

এক দিনে এক বৎসর লাগে
করি হায়রে হায়
কইয়া গেছলায় কোনো দিন
আমারে ভুলতায় নায়;
চখোত কইছলায় ঘুম আইতনায়
অভাগিরে ছাইরা।।

তুমি পুরুষ আমি নারী
ধরি তোমার পাউ
দোহাই লাগে আমি তোমার
কিতার দায় কান্দাও;
আইয়া যদি জাইতাগি চাও
রাখলাম নেনি ধইরা।।

বালিশেতে বুক ছাপিয়া
পালাই চখোর পানি
রাত পুয়াইলে দিন পুরায় না
আর কতো দিন গুণি;
জীবন যৌবন মন প্রাণী
লইয়া গেছো হইরা।।

আমির উদ্দিন তুমি বিনে
কিলা কওছাইন বাছে
মুই অভাগির মনের কথা
কইমুগি কার কাছে;
হয়তো কেউ বুলাইয়া রাখছে
মাইনষে কতথা কইরা।।