কিতার লাগি আইলে ভবে, চিন্তা করছনি।
যে কাজের ওয়াদা আছিল, অউ কাজ করতে পারছনি।।

ভাবিলে ধুন ধরবো মাথায়, মিছা নায় হাছা কথায়
কিতা লেখছো খাতার পাতায়, নিরব হইয়া পড়ছনি।।

মন থাকলে মনো পড়ব, নিশা খাইলে দীশায় ধরব
দেখা হইলে জিজ্ঞাস করব, অউ কথাখান ধরছনি।।

মইরা গেলে ঠগা খাইবে, মানব জনম আর না পাইবে
ভেখ ভেখাইয়া চাইয়া রইবে, বিশ্বাসে মাল ভরছনি।।

আমির উদ্দিনের আকল থুড়া, না বুজিলাম ভালা বুরা
আজরাইলে নিলে ঘোড়া, দেখবেনে আর দৌঁড়ছনি।।